მე არაერთი გზა გადავლახე,

ბევრი ოცნება გულით ვატარე,

ქვეყნად რამდენი ქალაქი ვნახე,

ყველა, თბილისო, შენ შეგადარე!

თბილისო, ჩემი ოცნების წყაროვ,

ძველთაგან მოგსდევს ძალა მთებური

შენი ნათელი მომავლით ვხარობ

საკუთარ ხვედრზე ჩაფიქრებული.

ქუჩებს და ხიდებს და სახლებს შენსას

თავს დასტრიალებს ჩემი ფიქრები,

გიმღერი იმას, რაცა ხარ დღესა,

და იმას ჩემო, რაც ხვალ იქნები.

ვის გაუყვია ჩემი და შენი

გაღიმება ან გულის ჭრილობა,

შენ ჩემი კარგი სიმღერა გშვენის

მე შენი ლაღი მხარგაშლილობა.