ღამემ ფიქრები მოკრიბა

დამჭკნარ ვარდებად ნაფენი,

ჩემი სოფელი ოკრიბა

ბავშვობა მზეში ნარბენი.

ღრუბლებში მთვარე ახალი,

ვირის ნალივით პატარა,

წვიმით მოვიდა მძახალი -

ნეტავი გამოადარა.

კვირას ქორწილით მთელ სოფელს

ახარებს ჩვენი კერია

და ქალამანი მეზობელს

რა კარგად შეუკერია.

რძალს მოყვა მთელი ამალა, -

ლებები დაულამბავი,

შემდეგ ცრემლებმა დამალა

ჩემი ბავშვობის ამბავი.