იღიმებოდა,

ბავშვი უმანკოდ იღიმებოდა,

იღიმებოდა და იზრდებოდა...

იღიმებოდა - 

ყრმა გულწრფელად იღიმებოდა,

იღიმებოდა სიჭაბუკეც

კეთილ ღიმილით;

მერე და მერე: სათნოდ, ნაზად,

მწარედ, დაცინვით.

ყალბად, მაცდურად თავმომწონედ

თუ თანაგრძნობით;

საწყლად, ამაყად, გაურკვევლად,

ურცხვად თუ მორცხვად

(ათასგვარია მოწიფული კაცის ღიმილი)

ხან კი, რაც მეტად სამწუხაროა,

ბოროტ ღიმილსაც გამოურევდა.

იღიმებოდა ძე ადამისა,

მთელი სიცოცხლე იღიმებოდა,

რომ აღბეჭდოდა ბოლოს

სახეზე

გაკვირვებული კაცის ღიმილი.