სასიხარულო ბევრი რამ არი:

დღეს გაზაფხულმა დაიდგა ტახტი,

ლამის შევიხსნა წელზე ქამარი

და ვითამაშო ბიჭებთან ლახტი.

მზის ამოსვლამდე ვიარო ასე,

თვალი შევასწრო სინათლის ჩქერებს,

დავრეკო ზარი ვიღაცის კარზე,

ცელქი ბავშვივით გავიქცე მერე.

შევხედო ცაზე ღრუბლის ცვლილებებს,

შორს გადავაგდო ქუდი ახლავე,

მერე ჯანდაბას, თუ დამცინებენ,

თუ გამკილავენ, თუ დამძრახავენ...

დღეს მე ვიგრძენი მხოლოდ ალერსი,

დღე დაემგვანა ნაზ მანდილოსანს,

ზეცამ ცრემლები უნეტარესი,

ნეტავი, მალე დამადინოსა...

მალე იქუხოს, მთებს დაახველოს,

ვაშლის ტოტებზე აფეთქდეს კვირტი,

იქნებ აპრილმა გამინახევროს

დაუწერელი ლექსების ტვირთი.