აყვავებული ატამივით

მოსჩანს ნოსირი,

მშვენიერია,

როგორც ქალი ძაძით მოსილი.

საეჭვოდ გიმზერ 

მშვენიერო და სევდიანო

და შენს ჩრდილებში,

როგორც ბაღში, დავხეტიალობ.

ვინ მოგიქსოვა ჭრელაჭრულად 

თუშის წინდები,

მითხარ ვის ეტრფი,

მითხარ ვისზე დაქორწინდები.

ვინ გეყოლება მეჯვარედ და

ხელისმომკიდედ,

მაგ ოქროს ყანას

რანაირი მკელი მომკიდეს.

სიმღერა მესმის წვიმასავით

სევდაგაბმული,

ნისლის ფარჩაში გახვეულა

დღე გაბადრული.

აყვავებული ატამივით

მოსჩანს ნოსირი,

მშვენიერია,

როგორც ქალი ძაძით მოსილი.