ტკბილად ჩამესმის ნანასავით ტყუილი, როცა

სიმართლე ყელში გაჩხერილი აღარ გადამდის...

ოღონდ თქვი რამე - ნუ იქნები მართალი ცამდი,

სიამოვნებით დავესწრები სიტყვების ხოცვას.

ჭეშმარიტებამ გვირგვინი ცრუს გადაულოცა.

ალბათ ცხოვრების სისასტიკეს მოსდგამს ადათი:

იყოს სულგრძელი, თუმცა მოკლე ფეხებით დადის -

ტანჯული სული რომ გარდაქმნას საამო ლოცვად!

მე კი არადა, გასუსული უფალიც ისმენს

მისგან გამოთლილ კლავესინზე დარხეულ სიმებს

და ნირვანაში გადასული სი-ბემოლიდან

უკან მიბრუნებს რიოშ ბგერებს კონტრაპუნქტებით...

გამართული აქვთ ტყუილ-მართალს ჩემში კორიდა,

და თუ სიცრუემ დამამარცხა- აღარ მოვკვდები!