თქვეს ერთხელ სამთა ანგელოსთა: - როგორ დავბადოთ

კაცი ყველაზე ბედნიერი და უბედურიც,

რა დავაწყევლოთ, ან ისეთი რა დავანათლოთ,

ათასჯერ ბედის თქვას მადლობაც და საყვედურიც.

პირველად თეთრმა ანგელოსმა წარსდგა ნაბიჯი:

დავბადოთ კაცი მდიდარიო, მაგრამ მახინჯი.

წითელმა: ის სჯობს, ყრმა ოცნებებს ნუღარ მიეცეს,

ულამაზესი იყოს, მაგრამ უღარიბესიც.

ბოლოს კი შავი ანგელოსი წამოიმართა

და შავი სიტყვა განუცხადა ცათა ბინადართ:

სასჯელი გინდათ? მაშინ დიდი კაცი დავბადოთ,

სახელ-დიდებით შესწვდებოდეს ცათა კაბადონს,

ოღონდ დავბადოთ სულთა მედროშედ,

დავბადოთ მგოსნად

და უთუოდ -

საქართველოში...

იმ ღამეს ჭყვიშთან ვერ დიოდა წყნარად რიონი,

თურმე იმ ღამეს დაიბადა გალაკტიონი.