მინდვრად ყაყაჩო გაშლილა,

მთაში ირემი ყვირის.

დღეს მომენატრე საშინლად,

მომენატრე და ვტირი.

ტყეზე ნისლები მიდიან,

ნისლები სვილისფერი,

სამყარო ისე მშვიდია,

მომენატრე და ვმღერი.

ჭალას ყორანი ყრანტალებს,

მზეს ეფიცხება გველი,

ვკოცნი გადასულ ნაკვალევს,

მომენატრე და გელი.

სოფლის თავს გოგო პატარა,

მიდის, შაშვივით გალობს.

ცად აიკრიფა ვარსკვლავი,

ბუტბუტით ჩადის წყარო.

მინდვრად ყაყაჩო გაშლილა,

წვიმა იღვრება წვრილი.

დღეს მომენატრე საშინლად

მომენატრე და ვტირი.