მესმის თბილი თოვლის ხრაშახრუში,

ბარდნის, გაზაფხული ბარდნის, -

მზეო, აგვიანებ სამსახურში,

დაწერე განცხადება და... წადი!

ვზივარ სავარძელში ბატონივით,

ვიხდი იუბილეს, ხადილს, -

სულო, რამ გაგხადა კმაყოფილი...

დაწერე განცხადება და... წადი!

ხომ ხედავ, ვეღარ ვმხიარულობ,

დარდი მომერია, დარდი, -

თავი დამანებე, სიყვარულო,

დაწერე განცხადება და... წადი!

ლექსი, გალობაში გამოგცადეს,

ხომ არ დაგიკარგავს მადლი, -

ხალხში თუ გვიან გამოცხადდი,

დაწერე განცხადება და... წადი!

მე აქ როგორ უნდა ვიოცნებო,

შენ თუ არასოდეს გწამდი,

კმარა დღეგრძელობა, სიცოცხლეო,

დაწერე განცხადება და... წადი!