ყველასათვის ცუდი მსურს,

სინიდისის მტერი ვარ;

თაყვანსა ვსცემ მტრობა-შურს

და მით ბედნიერი ვარ!

ვწერ და გროშებს დავეძებ,

ცოტასაც არ ვჯერი ვარ;

თუ არ მომცემს - ვიტაცებ

და მით ბედნიერი ვარ!

წარა-მარა მელანს ვღვრი,

პუბლიცისტად ვწერივარ;

თავ-ბრუ მესხმის და ვყვირი:

„მხედავთ? ბედნიერი ვარ!!"

ბატის-ტვინა, შოშია,

ჭია-ღუა, მწერი ვარ!...

ვყეფ მე, როგორც შოშია

და მით ბედნიერი ვარ!

პატრონი მყავს გულ-დიდი

მეც მის შესაფერი ვარ!

მრუდე მაქვს გზა და ხიდი,

მაგრამ ბედნიერი ვარ!

შევწუწკუნებ რედაქტორს,

მისი ფეხთა-მტვერი ვარ!

სხვას ვერ ხედავს ის ჩემ სწორს

და მით ბედნიერი ვარ!

მხოლოდ მისი გულისთვის

თითქმის ყველაფერი ვარ!

რჯულს გავყიდი ფულისთვის

და მით ბედნიერი ვარ!

ცუდს ვფიქრობ და ცუდი მსურს,

კარგი კაცის მტერი ვარ!..

ქვეყნად ვთესავ მტრობა-შურს

და მით ბედნიერი ვარ!..