თქვენ გელოდათ ოთხივ კუთხივ

სასიძო თუ დანიშნული,

ალბათ გახსოვთ ხათუნების

ხაბარდების შარიშური.

ალბათ გახსოვთ შორეული 

გზები, ხვატით გადამწვარი;

ზურგზე ოქროს ტახტრევანში

თვალჟუჟუნა პატარძალი.

თუმცა როცა მიაღწევდა

თბილისს თქვენი ქარავანი,

ზარ-ზეიმით იღებოდა

ნარიყალას გალავანი.

ყვითელ ქვიშნარს, სადაც მხოლოდ

საქსაულის ბუჩქებია,

ამ გოგონებს, ამ ვაჟკაცებს

ბაღ-ვენახი ურჩევნიათ.