ზღვა ნაწვიმარზე ადრე მწუხრდება,

მებადურებმა დასძრეს სანდლები.

მთვარის ამოსვლა აფრებს უხდება,

თითქო ანთია ზღვაზე სანთლები.

ზღვა თითქო ნაპირს ემუდარება,

გულში ქარიშხლის მიპყრობს ეჭვები.

ზღვა ცას, მოკენჭილს, დაედარება,

და დაცურავენ ზღვაში კენჭები.

სანდლების მწკრივი მიეშურება,

ზღვა დამშვიდდება ალიონამდი.

დილით გააღებს თვალებს ბუნება

და მზე შემოვა, როგორც ხომალდი.

უკუიქცევა და გამომყვება

ზღვის მოტანილი მლაშე სურნელი,

თეთრი ღრუბელი ზღვაზე გალღვება,

თვალწინ გაქრება თეთრი ღრუბელი.

ვპოვებ ნიჟარით შემკულ ხომალდებს,

შემიპყრობს დილით უცხო ზმანება, 

და ზღვა თათივით ტალღას მომადებს,

თვინიერ სპილოს დაემგვანება.