წუთია წუთისოფელი - 

დახამხამება თვალისა,

ამქვეყნად წესი არ არის

მეორედ მოსვლა მკვდარისა,

ამიტომ გვმართებს ცოცხალთა 

მოხდა სიცოცხლის ვალისა.

ვერ ვის შეუძლავ, ვერც შესძლოს

გახსნა სამარის კარისა,

იმ ქვეყნით მეორედ მოსვლა,

მიწის დანგრევა მყარისა.

საწუთრო არის მტვირთველი 

ქვეყნად ტკბილის და მწარისა,

წუწუნიც იმას ეკუთვნის, 

მთაზეც ყვირილი ხარისა,

უნდა გიყვარდეს სამშობლო, 

თუ ხარ ქართველის გვარისა,

არც ლხინი თავბრუს გასხამდეს, 

არც გეშინოდეს შარისა.

წასულს არ უნდა გრცხვენოდეს 

დატოვებული კვალისა.

უქმად ნატარი სიცოცხლე 

ფასი არ არის ჩალისა.

ერთი რამ არის საწყენი 

საწუთროს სამართალისა,

რატომ არ იცის გარჩევა 

მამაცისა და მხდალისა?!