ეს ფერადი მინდვრები,

ეს ნახატი ჭალები,

მკერდზე ყაყაჩოები

ცეცხლად რომ გასჩენიათ,

მარადმწვანე ქედები,

მთები დათოვლილები,

ბორცვია თუ ტაფობი,

ხევია თუ ფშანია,

ამერი და იმერი

აღმართით და დაღმართით,

მიწა - ასიათასჯერ

სისხლით გადანამული, - 

კარგად დაიმახსოვრე,

კარგად დაიმახსოვრე.

კარგად დაიმახსოვრე -

არის შენი მამული.

დიდი წიგნი რუსთველის,

დედაენა ქართული,

განძი, რაც შეუქმნია

ჩვენი ხალხის გენიას -

ტაძრები და კოშკები,

ქალაქები, სოფლები,

არის ახლად ნაგები

თუ ძალიან ძველია,

ჩაიძვრინე გულშიაც,

ჩაიძვრინე სულშიაც,

მერე ვაივაგლახად

გვერდს ნურაფერს აუვლი,

გაუფრთხილდი, ძვირფასო,

მართლაც თვალისჩინივით,

რადგან ეს ყველაფერი

არის შენი მამული.