გალაკტიონს გაუმარჯოს! გაუმარჯოს გალას!

ქართულ ძუძუს! ქართულ ბაგეს! ქართულ თავის ქალას!

გაუმარჯოს ქართულ მხარ-მკლავს, იმათ ბრძოლით მოღლას!

ქართულ სიტყვას! ქართულ სუფრას! ლეონიძე გოგლას!

გაუმარჯოს ქართულ ზეცას და ვარსკვლავებს უთვლელს!

უფლის შეგირდს გაუმარჯოს - გასაოცარ რუსთველს!

გაუმარჯოს ქართულ ანბანს, ზღვათა შესაკრებელს!

კავკასიონს გაუმარჯოს, ქართველივით ბებერს!

და სიკვდილსაც გაუმარჯოს - სიცოცხლეთა მიზანს!

მარადიულ სიჭაბუკეს, გაუმარჯოს მირზას!

ვინც გული ალმოდებული მამულის ფერხთ დადო,

დევს შეება ასთავიანს - გაუმარჯოს ლადოს!

გაუმარჯოს ქართულ გუთანს, ქართულ ქედს და მაჯას,

რაზიკაშვილს გაუმარჯოს - სულცისკრიან ვაჟას!!!

ქართველ დედას გაუმარჯოს! და ნატერფალს მისას!

ხუთკუნჭულას, ხარს წიქარას, გულთამხილველ მისანს!

დაიჩოქეთ! წინაპრები სათათბიროდ სხედან!

დედამიწა არ ეღირსოს საქართველოს ცხედარს!!!