დაცემულ რწმენის, გინა სიმართლის,

კვლავად აღდგომად - აღსდექ, ლაზარე!

ვიდრე ბოლომდე ნათლის კარს - რკინის

ბნელის ურდულით ჩაგვირაზავენ.

წმიდისა მისი ნება-შეწევნის

რათა ვირწმუნოთ - აღსდექ, ლაზარე!

ვიდრე ცრუთა და ფარისეველთა

მზეი ცხოველიც არ შეგვაზარეს...

ძველ ზარებს არსად აღარ რეკავენ,

ახლა ზრიალი გააქვთ სხვა ზარებს,

კაცთა, მართალთა, სულის სალხენად,

სულის მეოხად - აღსდექ, ლაზარე!

ისევ განივრცე ქართლსა ფრიადსა,

მაშრიყ-მაღრიბი დაისამზღვარე;

ბნელეთის ბჭენი შენი მაისის

ჭექა-ქუხილით შეაზანზარე.

თორემ დამაშვრალ ფუტკრების სკაში

ავი ბზუილი გააქვთ კრაზანებს,

და ჰა, საცაა ნათლისმგმობელნიც

რწმენის ნათლის კარს ჩაგვირაზავენ.

და ვიდრე ცრუთა - ეშმას მსახურთა

სიცოცხლეც ჩვენი არ შეგვაზარეს,

წამოდექ რისხვად და ძლევად მათდა,

სასწაულებრივ აღსდექ, ლაზარე!