სიონში შუბლზე რომ გეფარა მუხის ფოთოლი

ვეება ლოდად გადაიქცა. ის ლოდი ფარავს

ახლა ჩვენს სახელს,

მაგრამ საქმე იცოცხლებს მარად.

შენ რომ ააგე შენი ხელით ციხე-გოდოლი,

ჩვენ დავაქციეთ. შეგაგინეთ, როცა გვაკურთხე,

როცა დაგვლოცე -

შიგ სახეში შემოგაფურთხეთ!..

ასეთები ვართ ჩვენ - სამშობლო ქვეყნის გამცემი

ნაძირალები

და მარადი ქონდრისკაცები!

შენახული გვაქვს შენი შუბლის გამხვრეტი ტყვია

ოქროს ლუსკუმით. სამეუფო მიწას რომ სცხია -

იმ შენი სისხლით თუ აღდგება ვინმე შენებრი

მოსაკვდინებლად მივვარდებით ისევ ჭენებით!..

ასეთები ვართ ჩვენ – სამშობლო ქვეყნის გამცემი

ნაძირალები

და მარადი ქონდრისკაცები!

"მარად და ყველგან" - რომ ამბობდი,

ჰო, მარად, ყველგან,

აწ და მარადის და ყოველთვის

დაზრდილებს შენგან

შენსავ ბუნაგში დავუხოცავთ იმ მურა ლეკვებს,

რომ არასოდეს შენნაირთა არ იყო მეკვლე!..

ასეთები ვართ ჩვენ - სამშობლო ქვეყნის გამცემი

ნაძირალები

და მარადი ქონდრისკაცები!

ასეთები ვართ

და ვიქნებით მუდამ, მარადღე

ჩვენ ასეთები,

რომ არასდროს მკვდრეთით არ აღდგე!