გნოლები ატირდნენ გარდაცვლილ ბაღებში,

უეცრად შეირყენ მსოფლიოს მკვიდრები

კოშკები დაიმსხვრა მეწყერის ტალღებში,

შეშლილი ძახილით გაფრინდნენ მინდვრები.

სამარედ გარდიხსნა ქვეყნები მხატვრული,

წითელმა ყორნებმა დაგლიჯეს ტიტანნი -

და მთები ალისფერ სისხლის მონატრულნი

ნელი-ნელ დაითვრენ  ვითა მიკიტანნი.

რაშები აცეკვდნენ ლოთური ხმაურით,

ძეგლებად წარმოსდგა ველური ზმანება,

მღერაში ჩასაფრდა კვნესა უცნაური,

ძაძები ჩაიცვეს მოცინარ ზარებმა.