დამისხი, დამალევინე

ვაჟას ნექტარი,

გალას ნექტარი,

გინა ფედია ჩუდეცკის:

ერთი ოყა და

ერთი ჰექტარი

ღვინო ნაღდი და "ჩუდესნი" -

ეგება ჭურში მეჩვენოს

ჯდომა გუგულის ბუდეში.

ეს რა ძალა აქვს ღვინოსა,

რად ვერ გაიგო სპინოზამ!

ღვინო სიკვდილზე მეტია -

იცოდა მხოლოდ ფედიამ.

და სომდა, სომდა იმგვარად

ვაჟას ლექსები რო არი,

გალას ლექსები რო არი...

ღმერთმა სიკვდილი მიჰგვარა -

დასხდნენ და ერთად დალიეს

სიკვდილის შესანდობარი.

ჩემი მაზანდაც მანდ არი -

არც მიწა მაქვს და

არც - ბარი,

და მაინც ვბარავ და ვთესავ

მესიტყვე იოანეში

ლუკას,

მარკოზს და მათესაც -

დიონისური მანეჟით.

დამისხი, დამალევინე

ქრისტეს მტევნიდან ნაჟური -

სიკვდილთან უნდა დავლიო

ვახტანგური და ვაჟური!