გამიღიმე და მართლა ვირწმუნე, -

ქალის ღიმილი ყველაფერია.

არცერთ ასაკს და წლებს არ ვიწუნებ,

თუ ბულბულები სულში მღერიან.

რადგან სიყვარულს ვარ მინდობილი,

აღარ მაწუხებს წლები სრულიად.

ეს ჩემი თმები შენზე ლოდინით

გათეთრებული ჩემი სულია.

ასე მგონია, მე შენ გელოდი

და ჩემი წლები ხარკად გავიღე,

ალბათ შენა ხარ ის ანგელოზი,

მე რომ სამოთხის კარებს გამიღებს.

პოეტის ტკივილს სხვა ვინ გაიგებს,

თუ არა ისევ გული პოეტის.

წლები სანთლებად ჩამოვარიგე

და სალოცავად შენთან მოვედი.

ხომ ოდითგანვე არის ცნობილი,

რომ სულს ჭაღარა არ ეკარება,

და ვდგავარ ახლა ხელაპყრობილი,

შენს გულთან, როგორც საყდრის კარებთან.