მიხარის შენთან გატეხა პურის,

და შენი ჯიღა თვალების სითბო,

ასე ალალი

და ასე ძმური -

ერთი შეხედვით

სულ სხვა ხარ... თითქოს...

შენ ლექსების ლერწმოვანები

გადარეკლილა ვეფხვის თვალებში

ეგ სიყვარული არ დამანებებს

სიტყვა გაკადრო გულის გარეშე,

სხვა პოეტებსაც არ ვედავები -

ყველასი მიყვარს ლექსი ნამდვილი, -

ვისაც არასდროს ეცოტავება

ორი მტკაველი დედის მანდილი

ვინც ვაჟკაცია

მართლაც

მართალი

ლექსით,

ოცნებით

საქმით,

მიზნებით,

ვინც დღენიადაგ მამულს დაჰხარის

და ღამე სძინავს ფესვის სიზმრებით!