მე ვიხსენებდი წუხანდელ სიზმარს,

როდესაც ოდნავ შეირხა ლელი;

როგორც კი ლელი შეირხა ოდნავ,

მაშინვე თოფი ავწიე მაღლა,

როგორც კი მაღლა ავწიე თოფი,

ძაღლი მაშინვე დააკვდა მიწას;

როგორც კი მიწას დააკვდა ძაღლი,

წამომიფრინდა მაშინვე მწყერი;

როგორც კი მწყერი წამომიფრინდა,

დაიგრიალა მაშინვე თოფმა,

როგორც კი თოფმა დაიგრილა,

მწყერმა მაშინვე დაკეცა ფრთები;

როგორც კი ფრთები დაკეცა მწყერმა,

მაშინვე მოსწყდა მწევარი ადგილს;

როგორც კი ადგილს მოსწყდა მწევარი,

დაბლა დავუშვი მაშინვე თოფი;

როგორც კი თოფი დავუშვი დაბლა,

მაშინვე გული დამწყდა რატომღაც

და გამახსენდა ჩემი სიზმარი,

როგორც კი გული დამწყდა, მაშინვე.