აკლია! - ბევრი ამბობს და

არავინ ამბობს: მაკლია!

საქმე კი, ჩვენში დარჩეს და,

შენ რომ იფიქრე, მაგრეა.

თუმცა მთავარი ეგაა,

როგორ გადაწყვეტს დემოსი,

რომელიც ვიზებს არიგებს

სამოთხე - საედემოში.

არადა, ოქროს შუალედს

რომელმა უნდა მიაგნოს,

რომელი დაგვიდასტურებს

განაჩენსა და დიაგნოზს?

შენ თვითონ უნდა განსაჯო

ტეტიაა თუ გაგრია,

და, ვიდრე თვალს არ გაკლია

და, ვიდრე ყურს არ გაკლია,

შენ უნდა დაუხარისხო

შენი კეთილის მსურველებს:

რომელი სულელია

და რომელი მოისულელებს.

გამოიწვევს და აჯობებს

მეზობელს სხვა მეზობელი,

შერეკილს - შერეკილები და

წუთისოფელს - სოფელი.

ეგღა აკლდათ და აკლდებათ

ნაგომარს ნაგომარელი,

ხან მიზეზ-მიზეზ ჩიტის რძე,

ხან მიზეზ-მიზეზ მარილი,

და მუხიანი გასძახის

ნიგვზიანსა და კაკლიანს:

რა ოხრად გინდა სოფელი,

სადაც არავის აკლია?!