მზის ბატონობა ბოლოსკენ მიდის,

არდადეგების მართლდება არსი.

უკეთესია ეს მზისთვის იქნებ,

იქნება მზესაც დაედოს ფასი.

სატყუარაა ჰეგემონია.

აქ სიამაყე წამოიკოჭლებს

და უტოლდება, პლიუს-მინუსით,

ნაბახუსევზე ცარიელ ბოთლებს.

მზის ბატონობა ბოლოსკენ მიდის,

მზე უფრო მყუდრო ეტლში თავსდება.

რა წესით ხდება ფასის დადება?

ვინ მოიფიქრა გადაფასება?

დახლი მიაგავს გიჟურ ვერნისაჟს,

აქ ჯონჯოლივით ყრია ფართალი...

და ეჯიბრება ფასდადებაში

ჩემს ტყუილს შენი მწიფე მართალი.