ვის ებუტები?

ხმას ვის არა სცემ?!

რამ ჩაგიწყვიტა ეგ ხმა?

მშობელს ემდური დაჭრილს და ნაცემს?

შენ შეგარცხვინოს ღმერთმა!

შენს ერს ემდური? პატარას, ობოლს,

იმ გულს, ძლივსღა რომ ფეთქავს?

დედას ემდური, რომ ავადმყოფობს?

შენ შეგარცხვინოს ღმერთმა!

სიმწარე ჩვენი ბედის ცდუნების

ვითომ შენ წვნიე ერთმა?

ვის?! საქართველოს ედიდგულები?

შენ შეგარცხვინოს ღმერთმა!

ძმებს და მეგობრებს აქციე ზურგი?

ყველა გაწირე ერთად?

რისთვის გვიყვარდი, თუ ასე გძულდით?

ღმერთმა შეგინდოს, ღმერთმა!