სარკე... სარკეში დრამატული, უცხო ალები...

ვირტუოზულად ჩამოქნილი, სწორი პროფილი.

ყვითელ ოთახში სახიფათო ქარი ორპირი,

თვალებში მზე და უთვალავი ნაიადები.

ზღვა... ზღვის წიაღში არტისტული, მწყობრი რითმები

და აკვარელის ღამეული, ლურჯი გრაცია...

უკიდურესად პიკანტური დეკორაცია

ეგზოტიკურად მოწყობილი ლაბირინთების.

ცის ილუზია... ეფექტური, ზუსტი ფორმები...

და ფანტაზია - გამჭვირვალე ნაკადულებად...

სულის და გონის უსასრულო თავისუფლება

უდაბნოს მკაცრი, მისტიკური ფარაონების.

სარკე... სარკეში დრამატული ნაიარევი...

თვალებში მზე და იდუმალი ნაიადები.