ლურჯი ტალღების აშრიალებით

ზღვაური ტოვებს მთვარის სარეცელს...

ჩამოურიგეთ ჭიშკრებს ნალები, -

ქართულ ეზოებს თვალი არ ეცეს.

არ ეცეს თვალი ავის, მჩხიბავის

და არ მოაკლდეს სხივთა ჩქერილი,

რადგან წიქარა

- გზებს რომ მიბღავის,

საქართველოა გადარჩენილი, -

გადარჩენილი ყელის გამოჭრას,

მიდის,

მიზნისკენ მანძილს ამოკლებს...

თავისუფლების ველიც გამოჩნდა,

მალე ჩამოხსნის მახვილს დამოკლე.

სეტყვამ ვენახი რომ არ წალეკოს,

შავი მერცხლები ზეცას კოცნიან,

მესალამურევ,

ბიჭო შავლეგო,

ხარი წიქარა დამილოცნია.

კავკასიონის ამორძალები

ჩაუყვებიან ხევებს დამრეცებს...

უნდა გააკრან ჭიშკრებს ნალები, -

ქართულ ეზოებს თვალი არ ეცეს.