თვალი მიჭირავს შენზედა,

როგორც მიმინოს მწყერზედა...

- მე ვარ მახვილი შიშველი,

შენ ხარ ლერწამი წერწეტა.

- ჰაუ მახვილო კაშკაშა,

ვერ შეგეყრები ხვალ-ზეგა,

ან დამიგულე ქარქაშად,

ან შეგეჭრები ფხაზედა.

და აიტაცებს სიმღერას

ტაში და შემოძახილი,

ფრთებს გამოისხამს ლერწამი,

გაიფოთლება მახვილი,

- ახ, მწყერო გასაპუტავო,

ლერწამო ხმასაამურო,

ან როდის გაგკრა ნისკარტი,

ან როდის გასალამურო...