პატარა სიხარულებო,

მადლობა! დიდი მადლობა!

თქვენ რომ მადლობა არ გითხრათ,

იქნება უსამართლობა.

მაგრამ დღეიდან მშვიდობით!

ვეღარ შემაცდენთ, მშვიდობით!

ნელ-ნელა აგიხირდებით

და აღარ შეგიშინდებით.

მე დასავლეთით მივდივარ,

აღმოსავლეთისაკენ კი -

თქვენ წადით, სხვები მონახეთ,

სხვებს დაუყარეთ საკენკი.

სხვებმა დაიცხრონ პატარა

სიხარულების მანია,

მე კი გზა დამითმია და

ხელები დამიბანია.

სხვებს აპოვნინეთ ტახტები

უდედოფლო და უმეფო,

პატარა სიხარულებო,

პატარა სიხარულებო!